Jorge Martin është me të vërtetë i pafat. Pas frakturës së dyfishtë në dorë që nuk e lejoi të merrte pjesë në tri garat e para të kampionatit, si kampion në fuqi, u rikthye në Katar dhe u bë protagonist i një aksidenti vërtet të tmerrshëm, i ndodhur në pistën e Losailit. Fabio Di Giannantonio tha: “Kjo ishte skena më e keqe që kam parë ndonjëherë në jetën time. Më hyri një ndjesi e ftohtë në trup”. Martin ndodhet në spital, vazhdon të jetë i shtruar dhe Aprilia ka publikuar një përditësim mbi gjendjen e tij shëndetësore. Ndërkohë, piloti ka publikuar dy foto të tij në rrjetet sociale, imazhe me të vërtetë tronditëse. Njëmbëdhjetë brinjë të thyera dhe një pneumotoraks. Në Spitalin Hamad General do të qëndrojë i shtruar për disa ditë. Aprilia ka shpërndarë një komunikatë mbi gjendjen shëndetësore të Jorge Martin, ku theksohet se brinjët e thyera nuk janë gjashtë, por madje tetë. Piloti spanjoll do të duhet të qëndrojë edhe për disa ditë në spitalin e Katarit për shkak të pneumotoraksit: “Jorge Martin e kaloi natën në Spitalin Hamad General. Nuk vërehen dëmtime traumatike në tru, në shtyllën kurrizore cervikale dhe në organet abdominale. Një përditësim ka të bëjë me frakturat e harkut të brinjëve të pasme që rezultojnë të jenë tetë, nga brinja e parë deri te e teta, dhe tre fraktura të tjera në harkun anësor të brinjëve, nga e shtata deri te e nënta. Vërehet gjithashtu një përhapje e vogël pleurale në kuadër të pneumotoraksit të njohur. Jorge do të qëndrojë në Spitalin Ndërkombëtar Hamad për disa ditë deri në shërimin e pneumotoraksit.” Kampioni i botës në MotoGP ka postuar në Instagram një status në të cilin ka shkruar: “Falë Zotit, mund të kishte shkuar shumë më keq. Do përpiqem t’ju mbaj të përditësuar”. Dhe mbi të gjitha ka publikuar dy foto, që e japin shumë qartë idenë e gjendjes. Fotot e Martinit do të qarkullojnë shpejt nëpër botë. I urohet pilotit të dalë sa më shpejt nga spitali dhe të rikthehet sa më parë në motorin e tij Aprilia.

Të thuash i pafat është pak. Martin humbi kontrollin e motorit të tij në një kthesë të gjatë, duke rrëshqitur mbi bordurë. Një rrëzim i vërtetë, por problemi real erdhi më pas, kur Di Giannantonio, pa mundur ta shmangte, e goditi në shpinë me rrotën e përparme. Martin provoi të ngrihej përsëri, por natyrisht nuk ia doli. E gjithë bota e MotoGP-së u shqetësua dhe e mbështet, përfshirë edhe Pecco Bagnaia, rivalin e madh të sezoneve të fundit, i cili shkroi: “Vamos Jorge, eres grande”.

sfidanti.al