Max Verstappen ka kritikuar sërish drejtimin që ka marrë Formula 1 me makinat moderne, duke argumentuar se pilotët e talentuar nuk po arrijnë të bëjnë më diferencën si dikur. Në një intervistë për BBC, katër herë kampioni i botës tha se në të kaluarën piloti më i mirë mund të fitonte kohë përmes frenimeve më të vona dhe hyrjeve më agresive në kthesa, ndërsa sot duhet të mendojë vazhdimisht për kompromiset mes frenimit, përshpejtimit dhe shpejtësisë maksimale.

“Është e panatyrshme dhe e kundërta e asaj se si duhet të jetë”, u shpreh piloti i Red Bullit, i cili beson se makinat aktuale nuk reagojnë aq shumë ndaj komandave të pilotit dhe për këtë arsye talenti individual po kufizohet gjithnjë e më shumë. Verstappen solli si shembuj Yuki Tsunodën dhe Liam Lawsonin për të mbështetur argumentin e tij, duke theksuar se të dy kanë qenë menjëherë konkurrues në momente të caktuara kur kanë drejtuar makinat e Red Bullit ose Racing Bulls. “Sigurisht, duhet të bësh gjithsesi një xhiro të mirë dhe pilotët më të shpejtë do të jenë gjithmonë më të mirët”, tha Verstappen, megjithatë ai këmbëngul se makinat e sotme nuk janë mjaftueshëm të ndjeshme ndaj aftësive të pilotëve, duke rihapur edhe një herë debatin nëse Formula 1 moderne po i jep shumë peshë makinës dhe jo talentit të pilotit.