Ndonjëherë, jeta mund të marrë një kthesë të papritur që për disa njerëz përfundon si një histori suksesi. Paige VanZant, e njohur dikur si një prej shpresave më të mëdha të UFC-së, vendosi në vitin 2020 të mbyllte kapitullin e saj në sportet e përziera marciale, pavarësisht se kishte një bilanc pozitiv prej 8 fitoresh dhe 5 humbjesh. Pas disfatës ndaj Amanda Ribas në UFC 251, ajo e kuptoi se kishte ardhur koha për ndryshim. Një vit më vonë, Paige hapi kanalin e saj personal në platformën për të rritur OnlyFans, një zgjedhje që shumë e kritikuan në fillim, por që për të rezultoi shumë më fitimprurëse sesa karriera në oktagon. Në një intervistë për Only Stans, VanZant tha me sinqeritet:

“Fitova më shumë para në 24 orët e para në OnlyFans sesa në gjithë karrierën time si luftëtare.” Në bisedën e saj për TMZ, ajo shtoi: “Tashmë e shoh luftimin si një hobi, si një punë me kohë të pjesshme. OnlyFans është ajo që më siguron gjithçka që kam sot.” Që nga ajo kohë, ajo ka marrë mbështetje të plotë nga bashkëshorti i saj, ndërsa suksesin e ka ndërtuar mbi një kombinim të karizmës, disiplinës dhe vendosmërisë, cilësi që dikur e bënë një luftëtare të suksesshme në kafaz. Por si lindi kjo aventurë? Në një rrëfim për MMA Fighting, Paige kujton momentin kur gjithçka ndryshoi:

“Isha në makinë, po kthehesha në hotel pas një konference shtypi. U lidha në platformë dhe qëndrova ‘live’ vetëm një orë. Pashë që numri i abonentëve po rritej pa ndalim dhe arrita në rreth 52 mijë. Atëherë mendova: ‘Jeta jonë sapo ndryshoi përgjithmonë. Të gjitha rreziqet ia vlejtën.’” Sot, Paige VanZant është shembulli i një gruaje që shndërroi dështimin sportiv në triumf personal e financiar, duke provuar se ndonjëherë largimi nga ringu mund të jetë fillimi i një fitoreje shumë më të madhe.

sfidanti.al