Marcos Llorente ka njoftuar tërheqjen e tij nga futbolli ndërkombëtar në moshën 31-vjeçare, duke i dhënë fund aventurës së tij me Kombëtaren e Spanjës. Mesfushori i Atletico Madridit e konfirmoi vendimin, duke pranuar se, ndonëse është i vetëdijshëm se është ende relativisht i ri, mendon se ky është momenti i duhur për t’u larguar nga detyrat ndërkombëtare. “Kam vendosur t’i jap fund kohës sime me ekipin kombëtar spanjoll, pavarësisht se jam i vetëdijshëm se jam ende i ri”, ka thënë fillimisht Llorente. 31-vjeçari theksoi se vendimi ishte tërësisht personal dhe se e kishte menduar me kujdes përpara se ta merrte. “Është një vendim personal, për të cilin e kam menduar me shumë kujdes dhe, mbi të gjitha, një vendim që vjen nga zemra”, shtoi ai. Llorente shprehu gjithashtu mirënjohjen e tij për mundësinë për të përfaqësuar Spanjën gjatë gjithë karrierës së tij ndërkombëtare. “Ka qenë një nder të përfaqësoj vendin tim”, përfundoi lojtari i gjithanshëm i Atletico Madridit.