Kombëtarja U-17 do të nisë pasditen e kësaj të hëne një seleksionim tre ditor rutinë me futbollistët që aktivizohen në klubet dhe akademitë shqiptare. Ky do të jetë seleksionimi i dytë i ekipit Kombëtar U-17 për këtë vit teksa qëllimi kryesor është për të parë nga afër gjendjen e futbollistëve më të spikatur të grup-moshës U17. Trajneri Ardi Behari ka publikuar edhe listën me emrat e 20 lojtarëve të përzgjedhur. Të gjithë lojtarët e grumbulluar janë të vitlindjes 2008-2009 dhe 19-të prej tyre vijnë nga klubet e kampionatit shqiptar. Lojtarët e thirrur aktivizohen me Partizanin, Tiranën, Skënderbeun, Akademinë Pepa, Akademinë e Futbollit, Tomorrin dhe Vllazninë, ndërsa mbrojtësi Edolind Topalli vjen nga klubi i Beslidhjes së Kosovës. Nën drejtimin e trajnerit Ardi Behari, lojtarët e grumbulluar do të stërviten në ambientet e “Shtëpisë së Futbollit“  dhe do të punohet në aspektin fizik e teknik, por edhe në aspektin taktik individual.

sfidanti.al