Gianluigi Buffon, shefi i delegacionit të Kombëtares italiane, ka shprehur bindjen e tij për potencialin e skuadrës së drejtuar nga Gennaro Gattuso. Në prezantimin e Superkupës Primavera në Milano, ish-portieri legjendar theksoi rëndësinë e besimit dhe bashkëpunimit në këtë fazë të re për Italinë.

“Besimi është i domosdoshëm, nuk mund të na mungojë kurrë në këtë punë. Jemi të sigurt që kemi një kombëtare me nivel shumë të lartë dhe lojtarë të mëdhenj. Kjo është baza më e rëndësishme. Tani na takon neve dhe atyre, së bashku, të japim paraqitjet e duhura,” – deklaroi Buffon.

Ai foli edhe për periudhën e parë të Gattusos si trajner i Italisë, duke zbuluar se tekniku po viziton klubet e Serie A bashkë me të për të krijuar lidhje më të ngushta me futbollistët dhe drejtuesit.

“Në fillim Gattuso ishte shumë i emocionuar dhe është normale që kur arrin në role të tilla të ndjesh emocion. Tani ai ka fituar vetëdije dhe siguri për kërkesat që i sjell kjo detyrë, që është thelbësore për të bërë mirë,” – shtoi Buffon.

Sipas tij, ky “pelegrinazh” në kampet stërvitore të skuadrave është një hap i rëndësishëm për të ndërtuar marrëdhënie pozitive me klubet dhe për të siguruar bashkëpunim gjatë sezonit.

sfidanti.al