Interi po përgatit lëvizjen e radhës për Djed Spence. Në orët e ardhshme pritet një kontakt i ri me Tottenhamin, pas bisedimeve të para të zhvilluara javën e kaluar. Zikaltrit synojnë të kuptojnë më qartë kushtet e operacionit dhe të negociojnë për uljen e çmimit.
Tottenham e ka vendosur çmimin fillestar të mbrojtësit anësor në rreth 35 milionë euro, shifër që mund të shkojë deri në 40 milionë euro me bonuset. Paraqitjet e Spence në Botëror kanë rritur ndjeshëm vlerën e tij në merkato, duke bërë që klubi londinez të kërkojë të përfitojë maksimalisht nga shitja. Megjithatë, Interi shpreson të ketë edhe ndihmën e vetë lojtarit. Spence nuk është i kënaqur me statusin e tij si zgjedhje e dytë në Tottenham dhe, pavarësisht se mund të luajë në të dyja krahët, në të djathtë konkurron me Pedro Porro, ndërsa në të majtë me Destiny Udogie. Për këtë arsye, anglezi po mendon largimin dhe një rikthim në Itali, ku ka luajtur më parë me Genoan.
Interi e konsideron Spence si një kandidat të denjë për të marrë trashëgiminë e Denzel Dumfries, por vetëm nëse arrihet një marrëveshje me një çmim të përballueshëm. Zikaltrit presin që lojtari të ushtrojë presion për transferimin në Milano dhe të ndihmojë në uljen e kërkesave të Tottenhamit. Por Spence nuk është objektivi i vetëm. Interi kërkon gjithashtu një mbrojtës qendror dhe një mesfushor. Trajneri Cristian Chivu vazhdon të këmbëngulë për Curtis Jones, për të cilin Liverpool kërkon rreth 40 milionë euro.
Në bisedimet me Tottenhamin mund të diskutohet edhe për Cristian Romero, i cili është propozuar nga klubi anglez. Argjentinasi kushton rreth 50 milionë euro, ndaj Interi mund të tentojë një formulë huazimi me pagesë dhe detyrim blerjeje. Në listën e alternativave për krahun e djathtë janë gjithashtu Désiré Doué, Nahuel Molina, ndërsa po monitorohen edhe talenti i Reading, Amadou Mbengue, dhe Ivan Perišić. Për repartin e mbrojtjes, një tjetër emër që po vlerësohet është John Stones. Interi po punon për të gjetur formulën e duhur financiare, ndërsa shitjet e mundshme mund t’i japin klubit më shumë hapësirë për të realizuar objektivat e merkatos.
