Gina Schumacher, vajza më e madhe e legjendës së Formulës 1, Michael Schumacher, ka folur hapur për aksidentin e tmerrshëm me ski që babai i saj pësoi në 2013, duke treguar se si hobi për kuajt u bë strehë për të përballuar traumën.

Në dokumentarin ‘Horsepower: The World of Gina Schumacher’, 29-vjeçarja rrëfen se ndjeu nevojën të përqendrohej në diçka për t’u shpërqendruar nga ngjarja që e largoi babanë e saj nga jeta publike. “Pas aksidentit të babait tim, ia dedikova veten plotësisht kësaj sepse duhej të bëja diçka,” shprehet Gina. Pasioni për kuajt, i cili ekzistonte më parë, u forcua edhe më shumë pas aksidentit që ndodhi kur ajo ishte vetëm 17 vjeçe. “Kuajt gjithmonë kanë qenë të rëndësishëm. Por që atëherë… nuk mund të jetoj pa ta. Më kanë ndihmuar të kaloj gjithçka,” tregon Gina.

Ajo kujton se interesi i familjes për kuajt e racës ‘Quarter Horse’ lindi gjatë një udhëtimi në Dubai, ku babai i saj ra nga një kalë arab. “Nëna ime kishte një kalë dhe kur ishim të vegjël, desha të rikthehesha te hipizmi, por doja një kalë të butë,” shpjegon Gina, duke treguar se nëna e saj zgjodhi një ‘Quarter Horse’ pasi pa se si ai qetësonte kafshët e tjera.

Gina tregon mirënjohjen për mbështetjen e prindërve në karrierën e saj me kuaj. “Jam mirënjohëse që mund ta bëj këtë. Nuk është diçka që duhet marrë si e garantuar. Prindërit e mi e bënë të mundur. Prandaj ka qenë gjithmonë e rëndësishme për mua të punoj shumë në këtë fushë për të dhënë më të mirën,” thekson ajo.

Edhe Corinna, bashkëshortja e Michael Schumacher, ndan një kujtim nga fëmijëria e Gina-s: “Michael më tha njëherë: ‘Gina do të jetë shumë më e mirë se ti. Sepse është më egoiste. Si sportiste, duhet të jesh pak egoiste dhe kjo është e mrekullueshme. Pa këtë, nuk arrin asgjë.’ Sot besoj se ai kishte të drejtë.”

sfidanti.al