Bayern Munich ka marrë një vendim të rëndësishëm në drejtim të transformimit digjital brenda klubit: punonjësve u është ndaluar përdorimi i ChatGPT për detyrat e punës. Klubi gjerman ka nisur përdorimin e një platforme të vetën të inteligjencës artificiale, e cila tashmë po shtrihet në disa sektorë të brendshëm.

Sipas Welt, platforma e re e Bayernit përdoret veçanërisht në departamentin ligjor dhe në shërbimet e suportit për tifozët. Aktualisht, rreth 300 punonjës,  afërsisht një e treta e stafit të përgjithshëm, po e përdorin këtë sistem të brendshëm. Qëllimi i klubit është që inteligjenca artificiale të integrohet në çdo departament, duke rritur efikasitetin dhe duke mbrojtur të dhënat përmes një infrastrukture të bazuar në ‘cloud privat’.

Thomas Echemann, drejtues i sektorit të angazhimit digjital me tifozët, shpjegoi vendimin gjatë panairit ISPO në Mynih: “Ne kemi filluar të ndalojmë përdorimin e platformave të ndryshme të inteligjencës artificiale për punonjësit tanë, si ChatGPT. Kjo bëhet për t’i nxitur ata të përdorin platformën tonë. Për më tepër, gjithçka funksionon në një ‘cloud privat’. Mendonim se do të përballeshim me rezistencë të madhe, por nuk ndodhi. Punonjësit janë të kënaqur me zgjidhjen fleksibël dhe të thjeshtë.”

Vendimi i Bayernit tregon qartë tendencën në rritje të klubeve të mëdha për të zhvilluar teknologji të brendshme, duke siguruar kontroll më të madh mbi të dhënat dhe proceset operative.

Sfidanti.al