Kosova dominon Kupën e Pavarësisë në volejboll meshkuj dhe femra. Gjithçka ka ndodhur në Pallatin e Sportit “Bill Klinton”, ndërsa Ferizaj ishte fituese për meshkuj, kurse FER Volej për vajza. Pra i gjithë qyteti i Ferizajt në festë në këtë triumf të dyfishtë në rrjetën mbarëkombëtare. Për meshkuj ishte një duel i ashpër me Pejën, të cilën djemtë e Ferizajt e fituan 3-2.

Seti i parë ishte një maratonë e vërtetë, me dy skuadrat që luftuan për çdo pikë, por në fund Ferizaj u tregua më i ftohtë duke e mbyllur 30-28. Peja reagoi menjëherë dhe e fitoi setin e dytë 25-22, duke rikthyer ekuilibrin. Në setin e tretë, ferizajasit dominuan me ritëm më të lartë, por Peja nuk u dorëzua dhe mori setin e katërt.

E në setin final, në kulmin e emocioneve, Ferizaj mbajti epërsi të lehtë dhe, pas një fundi dramatik, triumfoi 15-13, duke ngritur trofeun e parë të këtij edicioni. Tek vajzat Fer Volej ka vazhduar rrugëtimin e saj triumfues duke e fituar edhe Kupën e Pavarësisë, pas një finaleje të fortë dhe emocionuese ndaj Pogradecit, të mbyllur me fitoren 3-1.

Skuadra ferizajase e nisi ndeshjen furishëm duke e fituar setin e parë me rezultat të thellë 25-14. Pogradeci reagoi në setin e dytë, ku shfaqi lojë të vendosur dhe e fitoi 25-23, duke e rikthyer finalen në ekuilibër. Në setin e tretë, në një duel pikë më pikë, ferizajaset ruajtën qetësinë në momentet e presionit dhe fituan 26-24.

E njëjta qetësi dhe vendosmëri u pa edhe në setin e katërt, ku Fer Volej kontrolloi lojën dhe e mbylli gjithçka me rezultatin 25-22, duke u shpallur fitues i Kupës së Pavarësisë 2025. Tanimë radha është për Ligën “Gjergj Kastrioti” si për meshkuj, ashtu dhe për femra.