Manchester United ka përfshirë projektin e stadiumit të ri të Old Trafford në listën e 22 impianteve që mbështesin kandidaturën e Mbretërisë së Bashkuar për Botërorin e Femrave 2035. Old Trafford, i cili nuk u mor parasysh për Euro 2028 për meshkuj, aktualisht është ende në fazat e para të rikonstruksionit. Megjithatë, edhe nëse planet e rindërtimit nuk marrin dritën jeshile, stadiumi do të vijojë të jetë pjesë e opsioneve në gjendjen e tij aktuale.

Kandidatura e përbashkët e Anglisë, Skocisë, Uellsit dhe Irlandës së Veriut është e vetmja në garë dhe pritet të votohet në Kongresin e FIFA-s në vitin 2026, gjë që praktikisht e afron turneun drejt konfirmimit. Në listën e stadiumeve të përzgjedhura figurojnë gjithashtu impianti i ri i planifikuar i Birmingham City dhe Wembley, i cili parashikohet të mirëpresë finalen. Nëse kandidatura miratohet, Botërori 2035 do të shënojë herën e dytë që një Kupë Bote zhvillohet në vendet e Britanisë, pas edicionit legjendar të meshkujve në vitin 1966 në Angli. Në total, janë propozuar 22 stadiume: 16 në Angli, tre në Uells, dy në Skoci dhe një në Irlandën e Veriut, sipas njoftimit të bërë të premten.

sfidanti.al