Irani ka vendosur të mos marrë pjesë në shortin e grupeve që do të mbahet më 5 dhjetor në Uashington, pasi SHBA refuzoi vizat për disa pjesëtarë të delegacionit, mes tyre edhe presidentin e federatës së futbollit.

Vendimi u bë publik nga federata iraniane përmes një zëdhënësi, i cili e quajti këtë veprim të administratës Trump “të pajustifikuar dhe të papërputhshëm me frymën sportive”. Çështja lidhet drejtpërdrejt me kufizimet e rrepta të imigracionit të vendosura nga Trump, të cilat prekin disa shtete, përfshirë Iranin.

Masa e qershorit, që ndalon hyrjen e qytetarëve nga 19 vende, parashikon përjashtime të kufizuara vetëm për sportistët, stafin teknik dhe familjarët që marrin pjesë në evente madhore ndërkombëtare,por jo për drejtuesit e federatave apo tifozët. Kështu, ndërsa lojtarët mund të marrin pjesë në gara, presidenti i federatës iraniane dhe përfaqësues të tjerë zyrtarë mbeten të përjashtuar, ashtu si edhe mbështetësit e Iranit dhe Haitit. Bojkoti i Teheranit merr kështu një ngarkesë të fuqishme politike, duke krijuar një situatë të ndërlikuar para një ceremonie që duhej të simbolizonte unitet dhe frymë sportive nën organizimin e FIFA-s. Pasojat e këtij vendimi mund të reflektohen si në marrëdhëniet diplomatike, ashtu edhe në zhvillimet sportive të ardhshme.

sfidanti.al