Edon Zhegrova te Juventusi do të jetë goditja e ditës së fundit të merkatos për bardhezinjtë. Marrëveshja me Atletico Madrid për shitjen e Nico Gonzalez i hapi dritën jeshile ardhjes së anësorit ofensiv kosovar, i cili në mëngjesin e sotëm ka zbritur në Torino për vizitat mjekësore të zakonshme, përpara firmës në kontratë.

Edon Zhegrova te Juventus, vizitat mjekësore dhe firma në program

Një kontratë trevjeçare, me Lille që mund të përfitojë rreth 20 milionë euro plus 5 milionë bonus. Tudor dhe Juventusi, me pikë të plota pas sukseseve ndaj Parmës dhe Genoas, do të mund të llogarisin kështu në një futbollist të aftë të luajë si në të djathtë ashtu edhe në të majtë, duke garantuar shpejtësi, papriturësi dhe teknikë. Në të kaluarën, lojtari i lindur më 1999 ka qenë objekt dëshirash në merkato edhe nga Napoli dhe Marseille. Që verën e kaluar Zhegrova kishte shprehur vullnetin për të lënë skuadrën franceze për një përvojë të re profesionale.

Kuriozitet i madh rreth këtij djali, që duhet të rigjejë gjithashtu ndjesinë me fushën. Ndeshja e tij e fundit daton pikërisht më 14 dhjetor 2024. Që prej asaj kohe, Zhegrova ka kaluar një kalvar të vogël për shkak të problemeve me pubalgjinë. Një dëmtim që e detyroi të përfundonte nën operacion, me kosovarin që dukej gati të kthehej në disa raste, por pa arritur dot, duke parë kështu zgjatjen e kohës së rikuperimit dhe duke humbur në fakt gjithë sezonin e kaluar.

I rikthyer në grup pasi ishte stërvitur edhe me skuadrën rezervë, Zhegrova këtë sezon nuk është grumbulluar në dy raste, zyrtarisht për probleme të vogla fizike, ndërsa në një rast (kundër Monacos) ka mbetur në pankinë. Tani për të nis një jetë e re te Juventusi, ku duhet të lërë pas shpine të shkuarën e afërt të vështirë, të mbushur me telashe fizike. Ndërkohë, mundësia për të shfrytëzuar menjëherë pushimin për kombëtaret do t’i lejojë atij të njihet më mirë nga Igor Tudor.

sfidanti.al