Gjermania është duke përgatitur detajet e fundit para se të startojë Euro 2024 që do ta luajë në shtëpinë e saj. “Panzerat” do ta startojnë këtë edicion të premten në ndeshjen ndaj Skocisë, teksa synojnë që të rikthehen te titulli që mungon prej vitit 1996. Sulmuesi i gjermanëve, Niclas Fullkrug theksoi se për të shkuar larg në këtë kompeticion, skuadrës së tij do t’i duhet që në fushë të shfaqë edhe arrogancë ndërsa shtoi se do të punojë shumë që të jetë ai titullari i ekipit, pavarësisht duelit me Kai Havertz.

“Jemi në një pozitë të mirë për të startuar turneun, shpresojmë që gjithçka të shkojë mirë. Kemi arsye për të qenë optimist, në turne të tillë duhet edhe pak arrogancë në fushë sepse këtë e kanë të gjitha skuadrat që kërkojnë të shkojnë larg. Konkurrenca me Havertz? Shpresoj dhe uroj që Kai të shënojë gola të cilat bëjnë të lumtur vendin dhe që dërgojnë kombëtaren përpara. Kemi një mundësi unike duke qenë se e luajmë këtë kompeticion në shtëpi. Sa i takon rolit tim në skuadër, unë do të punoj shumë në stërvitje dhe për të pasur kështu më shumë shanse për të luajtur”, u shpreh Fullkrug.

sfidanti.al