Teuta e shëmtuar në lojë? Martini heq nga harta e futbollit..Plorin e Vllaznisë!

Thonë se një shkodran , edhe në futboll, lind bashkë me humorin. Po kur janë dy shkodranë, madje trajnerë futbolli, por edhe  pretendentë për titull… s’bëkan humor, por  polemikë! Një polemikë që do të kujtohet   sepse humbi sensin duelit verbal nga njëri prej tyre.  Paska thënë trajneri i dytë i Vllaznisë, Elvis Plori, një zë ndryshe nga klasa  e zakonshme e trajnerëve,  se “Teuta  është ekipi që luan futbollin më të  shëmtuar  midis 5 pretendentëve për titull”.  I ka tingëlluar si një blasfemi futbolli   kjo frazë trajnerit të Teutës, Edi Martini , aq sa ka stakuar në moment “spinën e kujtesës” për bashkëqytetarin e tij: “ Kush  është ky Plori? Me kë ka luajtur dhe çfarë ka bërë?”

Për hir të së vërtetës, Plori  ka thënë një të vërtetë në mënyrën më të ashpër, pa patur frena në gjuhën e tij. Teuta e këtij sezoni  nuk është e bukur në lojë,  gërsheton si mënyrë jetese gjatë 90 minutave  një mbrojtje  stoike, me një mesfushë punëtore dhe   me një kundërsulm mpirës , që me anë të Bregut mund të konsiderohet si “vaksina” që të çon në ..bregun tjetër!  Nuk ka dyshim se Vllaznia e Plorit ka patur më shumë pamje në lojë, më shumë  shpirt aventuresk gjatë javëve të  kampionatit, por kjo nuk të jep siguri , sidomos në kohën e sotme, për të vënë në dorën në zjarr se  titulli fitohet më shumë me bukuri sesa me pragmatizëm…

Kjo polemikë midis Martinit dhe Plorit, që u  ndez nga ethet për titull, në Shkodër mund të mos tingëllojë mirë,  por nga e keqja, nga ferra, ka dalë edhe një e mirë, një lule që ia vlen te vaditet!  Ku ta gjesh, le të lusim zotin për këtë lloj polemikash, kur trajnerët  heqin njëri – tjetrin nga harta e topit  vetëm e vetëm për çështje stili në lojë…!

Sfidanti.al