Zakonisht në gjendje të tillë vendosen pijet për të qenë të freskëta kur të konsumohen, por edhe ushqime kur dëshiron të mos i prekësh me dorë për një kohë të gjatë. Po kur vendos “në akull” bisedimet për rinovimin e një kontrate në futboll, çfarë kuptimi ka? Një togfjalësh të tillë përdor tabloidi “Bild” për gjendjen e diskutimeve mes Barcelonës dhe njerëzve të portierit Ter Shtegen, që ende nuk kanë sjellë rezultat për kontratën e re.

“Unë jam shumë i lumtur tek Barcelona, – thotë gjermani, – çfarë mund të kërkoj më shumë se kaq. Kemi bërë një herë bisedime, por nuk është koha e duhur. Bisedime të dyta nuk ka pasur dhe në këtë kohë, kjo nuk është një temë”. Ndoshta portieri i kombëtares gjermane nuk ka dëshirë të largohet nga “Kamp Nou”, por edhe ai është i detyruar të luajë “në mbrojtje” për shkak të koronavirusit. Financat e katalanasve janë tronditur dhe thuhet se këtë periudhë kanë humbur 150 milionë euro, ndaj të dyja palët mesa duket nuk duan të nxitohen. Përderisa Ter Shtegen thotë se është i lumtur në Katalonjë, ne jemi të detyruar t’i besojmë.

Sfidanti.al