Ata që kishin planifikuar ndeshje të ligës spanjolle në SHBA kishin menduar për përhapjen globale të njërit prej kampionateve më të fortë të futbollit në botë. Një ndeshje Girona-Barcelona ishte menduar të luhej në Majemi në 26 janar, por ja që edhe në FIFA është kohë antiglobalizmi. Presidenti i saj, Xhani Infantino, e hodhi poshtë propozimin nga La Liga, propozim që për hir të së vërtetës u kundërshtua edhe nga Federata Spanjolle, dhe nga kapitenët e ekipeve në Primera Divizion.

Ja pra, që “efekti Tramp” po shtrihet edhe në futboll, pavarësisht se kjo nuk do të dëmtojë globalizimin e këtij sporti nëpërmjet televizionit dhe turneve të ndryshëm. “Ndeshjet e kampionateve duhet të zhvillohen në vendin të cilit i përket ky kampionat”, – ishte deklarata e Infantinos. Natyrisht, ka arsye për të votuar “pro”, dhe për të votuar “kundër”, por është e qartë se epoka në të cilën jetojmë, është një periudhë frike dhe pasigurie. Për momentin, globalë do të jenë turnetë ndërkombëtarë si Kupa e Botës, Kupa e Konfederatave, Kupa e Botës për klubet, si dhe kompeticionet e ndryshme të klubeve.

Sfidanti.al