Ka ndodhur shpesh që një atlet të humbasë një medalje të rëndësishme për shkak të përdorimit të dopingut, apo për shkak të ndonjë shkeljeje tjetër, por fatkeqësia e vërtetë është kur kjo ndodh kur nuk ke asnjë faj. Dhe kujt i ngjau? Vetë “lartësisë së tij”, Usain Boltit, kampionit absolut të sprintit në atletikë. Xhamajkani do të duhet të dorëzojë medaljen e tij të artë olimpike të stafetës 4×100 metra fituar në Pekin në vitin 2008, pasi një shoku i tij doli pozitiv për përdorim substance të ndaluar.

Ky shok është Nesta Karter, në atë kohë pjesë e katërshes kampione olimpike në Kinë. Ai u bë një nga 454 sportistët, të cilëve iu bë edhe një herë testimi antidoping, shtatë vjet pas Olimpiadës kineze. Xhamajka fitoi me kohën në atë kohë rekord botëror, 37”10, ndërsa Trinidad e Tobago doli i dyti, por tani mund të shpallet kampion.