MotoGP ka akord, propozohet fillimi në korrik me 2 gara në Jerez

MotoGP nxeh motorët dhe përgatitet të nisë sezonin. Në fakt është arritur një akord mes autoriteteve të rajonit të Andaluzisë, Këshillit Bashkiak të Jerez dhe Dornës për zhvillimin e 2 garave të para sezonale në pistën dedikuar Angel Nietos. Garat parashikohen të zhvillohën në 19 dhe 26 korrik, por për momentin e gjithë kjo është në kuadër të propozimit që i është drejtuar autoriteteve të larta spanjolle në Madrid; pra do të jetë qeveria Sanchez që ka fjalën e fundit në këtë cështje, sigurisht pasi të shohë sesi do të shkojnë gjërat me pandeminë coronavirus

Nëse do të vijë ky miratim nga kryeministri Sanchez dhe kabineti i tij qeveritar, FIM do t’i duhet të përpilojë një kalendar të ri ku të përfshihen edhe këto dy gara në Jerez. Për momentin parashikohet që gara e parë sezonale të zhvillohet në 9 gusht në Brno me Cmimin e Madh të Cekisë. Nëse gjithcka do të shkojë sipas parashikimeve, gara e parë në Jerez do të quhet Cmimi i Madh i Spanjës, ndërsa e dytë, Cmimi i madh i Andaluzisë

Një lëvizje të ngjashme duket se do ta bëjnë edhe drejtuesit e Botërorit të Formula 1 që në këtë sezon atipik synon të nisë sezonin në Austri me dy gara në pistën e Red Bull Ring të Spielberg në muajin korrik.

Sfidanti.al