Cili është “Pinoku” i vërtetë, presidenti Halili apo presidenti i presidentëve?

Kur tifozët e Tiranës kanë shpalosur banderolën  me “Pinokun”, që i zgjatej hunda  duke bërë ironi me presidentin e tyre Halili, sepse në ato momente, pikturuam me mendje një “Pinok” tjetër,  më të madh se ai që shikonim, që t’i ngjasonte sadopak presidentit Duka. Nëse  hunda e “Pinokut” të tifozëve bardheblu  pushtoi disa radhë në stadium, sikur të kishim sajuar një koreografi për  presidentin Duka, për mbretin e gënjeshtrës, me siguri hunda do të  ishte aq e madhe, sa “Arena” e Elbasanit, do të dukej si mos më keq për nga përmasat.  Cili piktor do të ishte kaq i zoti sa t’i jepte përmasat që meriton  “Pinokut” që na ka gënjyer  mrekullisht në këto 16 vite, duke na shëtitur me topin e shfryrë edhe nga “parajsa” në ferr.  Madje, për hir të së vërtetës, dhe na kanë pëlqyer përrallat e tij në disa momente historike për kombin dhe për të ..pavërtetën. Kujtoni ditët pas Europianit,  disa qytete  u gridën mes tyre, sepse donin të ishin të parët për ta graduar “Nderi i Qytetit” , pikërisht Pinokun, që talentin më të madh e tregon kur çnderon futbollin, më shume se kur e nderon atë.

Në ditët e përrallës ndërkombëtare të Francës,  e lejuam veten të blinim me shumë para suksesin , aq paturpësisht, sa kolektivisht varrosem ndërgjegjen dhe këndonim me zë të lartë: “ O sa mirë me qenë shqiptar”.  Përse nuk duhet të këndojmë prapë, kur Kukësi del kampion apo Tirana fiton Kupën e Shqipërisë?  Ku ka ndryshuar morali, sa për të patur kaq shumë indinjatë. Dikush mund të spiunojë dhe të thotë se këto dy ekipe, që u shpallën fituese të trofeve,  i  kemi kapur në flagrancë gjatë sezonit  në “krevatin e mëkateve”.  Sa herë e kemi falur Kombëtaren kur na tradhëton në mënyrë “patriotike” si me Serbinë dhe me Izraelin se fundi, përse shtirremi sikur jemi nryshe kur flitet me klubet. Pastaj, në kohën e Pinokut,  futbolli i vërtetë është një ves i keq, që nuk sjell para, kurse futbolli plot me hile dhe me prapaskena, me pazare dhe trukime,  është ajo që na mban gjallë sepse kemi vite që ..investojmë.

Sfidanti.al