Diferencat në Superligën shqiptare nuk janë aspak të mëdha, dhe kjo vlen edhe kur në fushë zbret kryesuesja. Dueli i dy prej ekipeve më të mirë të kampionatit në stadiumin “Niko Dovana” përfundoi 1-0 për Teutën vendase, ndërsa epërsia në pikë e Tiranës me Kukësin zbriti në 6 pikë. Dy ekipet u ndanë nga një gol i vetëm i veteranit Emiliano Vila që në minutën e 26-të, ndërsa rastet ishin të shumtë në të dyja portat.

Teuta u tregua më kërkuese, dhe sidomos ishte më lart në pjesën e parë, me tiranasit e trajnerit Egbo që u zgjuan vetëm nga fundi i 45-minutëshit. Pas pushimit, kryeqytetasit bënë më shumë, por jo me ndonjë diferencë të madhe. Egbo, i pyetur pas ndeshjes u shpreh se “jam shumë i qetë, pasi këto janë gjëra që ndodhin”. “E prisnim që mund të humbisnim, humbja mund të vinte një ditë, por do të vazhdojmë rrugën tonë”, – vazhdoi nigeriani.

Kjo do të thotë se Kukësi ka diferencë -6 me Tiranën, duke pasur më shumë shpresë për titullin kampion. Kuksianët e trajnerit Shehi fituan 4-1 ndeshjen e lehtë ndaj Flamurtarit, ku Abazi shënoi bukur, dhe Shkurtaj realizoi 3 gola. Në dy ndeshjet e tjera pati barazime, 1-1 mes Skënderbeut e Laçit, ku Krasniqi shpëtoi vendasit në fund, dhe 2-2 në Shkodër mes Vllaznisë e Bylisit, ku pati përmbysje rezultati.

Java 29: Teuta-Tirana 1-0, Kukësi-Flamurtari 4-1, Skënderbeu-Laçi 1-1, Vllaznia-Bylis 2-2. Të dielën: Partizani-Luftëtari 8-1. Renditja: Tirana 59 pikë, Kukësi 53.

Sfidanti.al