Funkel, nga trajneri i vitit në shkarkimin nga puna tek Dyseldorfi!

Në përgjithësi gjermanët njihen si më të ekuilibruar se kaq, apo ndoshta këta të Fortunës nuk janë gjermanë të vërtetë? Ndodh edhe kështu në vendin e madh europian, ku Fridhelm Funkel fillimisht ngrihet në qiell, e pastaj flaket tej pa asnjë mëshirë. Veterani që drejtonte Fortunën e Dyseldorfit në Bundesligë, u propozua nga klubi i tij që të zgjidhej si trajneri i vitit në qytet, pra mes gjithë sporteve të tjerë, por vetëm një ditë pas kësaj, Funkeli u shkarkua.

E larguan të njëjtët njerëz që ia vlerësuan lart 2019-ën, dhe që humbën besimin pas dy humbjeve të para këtë vit. Në vend të tij, në stol afruan ish-lojtarin e njohur Uve Rësler, i cili ishte tek Malmoe në Suedi dhe nuk ka përvojë trajningu në Bundesligë. Funkel, ndërkaq, ka një karrierë të gjatë si trajner duke drejtuar 11 skuadra, e duke fituar 6 ngjitje në Bundesligë. Në total, 61-vjeçari ka drejtuar ekipet në më shumë se 500 ndeshje.

Sfidanti.al