Atalantën apo rrogë 2.5 milionë euro në vit? Gjimshiti zgjedh me mendje ose me zemër!

Shumë futbollistë kanë pasur dilema të tilla. Berat Gjimshiti nuk do ta ndërrronte aq lehtë Atalantën e tij për ndonjë ekip tjetër, aq më pak për ndonjë klub jo shumë të shquar, por ndoshta ana financiare mund të ndikojë. Mbrojtësi i kombëtares shqiptare, sipas mediave në Itali dhe në Angli, kërkohet nga Fulhami i Premier Ligës i cili i jep një rrogë me diferencë më të mirë sesa ajo që merr tani.

Gjimshiti fiton 800 mijë euro në vit, pagë bazë tek Atalanta, ndërsa Fulhami besohet se i jep deri në 2.5 milionë. E tillë është diferenca e Anglisë sidomos me klubet normal të Serisë A, duke përjashtuar Juventusin, Interin e deri diku edhe Milanin.

Çfarë do të bëjë 27-vjeçari? Një zgjedhje vërtet e vështirë pasi një Atalantë e tillë, në një epokë krejt të veçantë, është e vështirë për t’u braktisur. Gjimshiti mund ta mendonte nëse do t’i vinin oferta nga klubet kryesorë në Itali apo në Angli, ndërsa Fulhami nuk është i tillë. Jo vetëm që Atalanta po shkëlqen në Serinë A dhe në Champions, duke qenë e papritura e dy-tre viteve të fundit, por edhe shqiptari i Kosovës është një nga më të mirët.

Jo më kot u shpall lojtari i ndeshjes në çerekfinalen e Kupës së Italisë ndaj Lacios, fituar 3-2, ku shënoi një nga golat, dhe ku mori pjesë në aksionet e rrjetave të tjera. Ai pati notën 7, dhe po kthehet gjithnjë e më shumë në një mbrojtës vërtet modern, që di të bëjë detyrën në prapavijë, por edhe të organizojë lojën e madhe të krijojë e shënojë gola. Duket me pak gjasa që ai të largohet nga Bergamo, ndonëse një pagë 3 herë më e madhe mund ta bëjë të mendohet.

Sfidanti.al