Ka krijuar një skuadër ëndrrash dhe dëshiron ta mbajë të bashkuar për të fituar sa më shumë me të. Jurgen Klop mund të ketë ngurrim për të rinovuar kontratën e tij me Liverpulin, por kjo nuk ndodh kur vjen puna tek yjet, të cilët nuk ka ndërmend të lejojë t’i largohen. Shenja e fundit ishte propozimi për rinovim me Sadio Manenë, të cilit sipas mediave po i ofrohen 11.5 milionë paundë stërlina në vit (rreth 13 milionë euro) me një zgjatje akordi deri në 2025.

Liverpuli u forcua kohët e fundit me Virgil Van Dajkun apo portierin Alison, ndërsa yjet e tjerë si Salah apo Firmino kanë kontrata afatgjatë. Të gjithë këta janë të kërkuar dhe klubi anglez nuk mund të lejojë të mos i ketë. Me kontratën e re, nëse bie dakord të firmosë, Mane do të fitojë shumë më tepër sesa me marrëveshjen e tanishme, sipas së cilës ka rrogë 150 000 paundë stërlina në javë.

Sfidanti.al