Gabriel Batistuta mbush 50 vjec. Prej 16 vitesh nuk luan më në Itali dhe prej 14 vitesh është tërhequr nga futbolli. Por në Itali e sidomos në Firence askush nuk e ka harruar sulmuesin argjentinas për atë që ai ka dhënë në fushën e lojës. Janë të shumta mesazhet e urimit në drejtim të Batigol që janë bërë nga bota e futbollit, nga ish shokët e tij të skuadrës, por edhe nga ata me të cilët ai është përballur që e kanë përkufizuar si një kundërshtar të fortë dhe besnik

Gabriel Batistuta është autori i 238 golave të shënuar me fanelën e Fiorentinës, Romës dhe Interit, 203 nga të cilat me fanelën violë. Ceki Gori e solli në Firence në vitin 1991 pasi e bleu nga Boka Xhuniors. Ishin të paktë ata që besonin te ky sulmues, por stërvitja dhe dëshira për t’u përmirësuar e shndërruan Batistutën në Batigol. në 8 shtator të 1991, Batistuta shënoi golin e tij të parë në Serinë A në ndeshjen kundër Xhenoas, por do të jetë ai i shënuar ndaj Juventusit pak javë më vonë që do ta shndërrojë përfundimisht argjentinasin në idhullin e tifozerisë së Fiorentinës.

Në 1994 Fiorentina u rikthye në Serinë A, dhe ishte ky viti i konfirmimit të Batistutës që shënoi në 11 ndeshje radhazi të kampionatit duke thyer rekordin e Paskutit. Batistuta u largua nga Fiorentina në vitin 2000 duke fituar një Kupë Italie dhe një Superkupë Italiane. Më pas ai u transferua te Roma e Kapelos për 70 miliardë Lireta. Me verdhekuqtë fitoi një titull kampion dhe një Superkupë. Por futbolli i tij që bazohej te forca fizike i shkaktoi edhe probleme të cilat i ndjenë më shumë kaviljet e tij.

Karriera e Batistutës në Serinë A përfundon me fanelën e Interit me të cilin u aktivizua për 6 muaj, nga janari në qershor të vitit 2003. Por pavarësisht titullit të fituar me Romën, Batigoli apo ‘Mbreti Luan’ të cilit i është dedikuar edhe një statuje si dhe i është dhënë titulli ‘Qytetar Nderi’, do të mbetet gjithmonë fiorentin.

sfidanti.al