Ivan Balliu do të mund t’u tregojë tifozëve shqiptarë dhe mediave të vendit të tij se çdo të thotë të kesh përballë treshen më të madhe sulmuese të Europës. Mbrojtësi i kombëtares kuqezi, në radhët e Mecit, u ndesh me Paris SG që tani ka një kombinim MCN, që i ka zënë vendin BBC-së së Realit dhe sidomos MSN-së së Barcelonës në renditjen e reparteve sulmues më të frikshëm të botës. MCN do të thotë Mbape-Kavani-Nejmar (nëse Kavanin e shkruajmë në gjuhën uruguajane (spanjolle), me “C”.

PSG fitoi 5-1 në fushën e Mecit, ndonëse Balliu me shokë rezistuan fort në pjesën e parë (në foto me numrin 25 pas golit), duke dalë në barazim 1-1. Kavani shënoi për epërsinë e hershme të superfuqisë së Ligës së Parë të Francës. Revierë barazoi, por u desh kartoni i kuq i vendasve, marrë nga Benua Asu-Ekoto (ndërhyrje ndaj Mbapesë) që ekuilibri të prishej plotësisht. Mbape realizoi në 59’, pastaj Nejmar në 69’, sërish Kavani në 75’ dhe Luka Mura në 87’, për të mbyllur festivalin e golave për të besuarit e trajnerit Unai Emeri.

Sfidanti.al