Talenti Dajot Upamekano ishte menduar se do të shkonte tek Mançester Junajtid, të paktën mediat raportonin se Zhoze Murinjo interesohej për të dhe e kishte në “radar”. Veçse, jo. Francezi gjeti “shtëpi” tjetër. Strehimi i ri quhet Rasenball Lajpcig, skuadra aktualisht numër 2 e Bundesligës. Me financimin e Red Bullit, gjermanolindorët paguan 11 milionë euro për 18-vjeçarin, veçse u ndihmuan edhe nga fakti se ai luante në Austri me një klub që është në lidhje të ngushtë me Lajpcigun, dhe që quhet Red Bull Salcburg, pra një emër i njohur. Kontrata e Upamekanos u nënshkrua deri në 2021.

Futbollisti i ri luajti 4 vjet në kategorinë e pestë në Francë, por pastaj kaloi tek Valensiena, me të cilën shkëlqeu dhe Salcburgu e mori për diçka më shumë se 2 milionë euro në 2015. Për Upamekanon u interesuan jo vetëm Junajtid, por edhe Mançester Siti dhe Arsenali po në Angli, ndërsa lojtari ka një fizik shumë të fuqishëm, pjekuri të madhe për moshën e tij dhe pritet të bëhet një lojtar i spikatur në të ardhmen.

Sfidanti.al